Liggt bi mi een Book up‘n Disch in‘e Slaapkamer, denn kickt mi mehrst van dat „Cover“ een Persönlichkeit an. Biographien lees ik besünners geern un stött up Facetten van de Person, mit de ik nich rekent harr. In mien Bökerregal steiht ok de Geschichte van Heidi Kabel un ehr Leven: „Manchmal war es nicht zum Lachen“. Dit Book hett mi so gefangen nahmen, dat ik as Läser glöövt harr, ik weer dor woll jümmer mit bi wesen. Wat se över de Tiet in‘n Krieg to vertellen hett, dat geiht ganz besünners unner de Huut. Se moss sik sülfst un ehre dree Kinner döör de Tiet bringen, een Tiet, in de dat nich veel to‘n Bieten geev. Een Book över Dieter Thomas Heck heff ik lääst, un just so een Biographie van Udo Jürgens. Nich vergeten heff ik Michail Gorbatschow, Helmut Schmidt un Helmut Kohl. Wat Kohl över de apen Muur un de „Wiedervereinigung“ schrifft, dat blifft fast in dinen Kopp sitten. Usen olen Bundespräsidenten Christian Wulff heff ik sülfst kennenlehrt; un so versteiht sik, dat ik sien Biographie „Ganz oben – ganz unten“ lesen moss. De Titel van dat Book seggt allns, un dat Book wiest us, wat sik achter de Kulissen allns afspäält un up wecke Art un Wies man Minschen in de Maak nimmt, de up de Eer fullen sünd.

Mit „Ganz oben“ un „Ganz unten“ kennt sik ok de ole Präsident van‘n FC Bayern München best ut, Uli Hoeneß. „Hoeneß – Die Biographie“, dat is een Geschichte över sien Leven, de di packt. Mit 22 Johrn weer he al as Nationalspäler Welt- un Europameister. In dat junge Oller van 27 Johrn moss he al dat Footballspääln togeven vanwegen een Verletzung. He wurd Manager bi sinen FC Bayern. In een Tiet, in de de Vereen‘n Barg Schullen harr un in de Tabelle just nich wiet baben stund. Dat kannst du mit‘n heten Kopp lesen, up wecke Art un Wies he ut den FC Bayern ene „Weltmarke“ maken dee. „Mia san mia“, dat is sien Satz. Hoeneß verstund dat Handwark as Manager, un sine Wöör, de kunnen „Attacken“ wesen un de Lüüd bang maken. Man in de harde Welt van dat Geschäft mit‘n Football kunn he jümmer woller wiesen, dat he ok een Minsch is. He harr för de groten Stars just so‘n apen Ohr as för de Putzfroo. Awer wi mööt weten, dat sien Karriere as Manager al in jungen Johrn meist een Enn funnen harr. An‘n 17. in‘n Februarmaand 1982 is he, as een Cessna 414 up de Eer störten dee, as de Eenzige an‘n Leven bläven, un dat ok bloots, wiel he sik kinen Remen anleggt harr un ut de Maschien ruutsmäten wurd.

2009 wurd de Manager Uli Hoeneß to‘n Präsidenten van‘n FC Bayern München maakt. Un dat is meist nich to glöven: Hoeneß as de Mann, de‘n Hand för dat Soziale hett, de luut över den Kapitalismus, de sien Grenzen nich kennt, schimpen kann, disse Hoeneß harr‘n Barg Stüürn nich betahlt un männigeen Johr mit Millionen an de Börse hanteert. In‘n Aprilmaand 2013 geev dat mit‘n Maal een heel anner Bild van Uli Hoeneß. He keem vör Gericht, un he moss för‘n paar Johrn achter Trallen vanwegen „Steuerhinterziehung“. Van een Revision hett afsehn, ok wenn sine Anwälte dat wullen. An‘n 2. in‘n Junimaand 2014 moss he na Landsberg to‘n „Strafvollzug“. In de Tiet warkel he in de Kleiderkammer för 1,50 € in‘e Stunn. Een Beamter in‘n Vollzug sä to em: „Se sünd de Eerste, de twee Fanclubs hett, wenn Se den Knast achter sik hefft: Enen Wärter- un enen Knacki-Fanclub.“ – As he free weer, hefft mehr as 97 % van de FC Bayern–Maten ehren Uli woller to‘n Präsidenten maakt. In dat Johr 2019 is he nich woller as Kndidat anträ‘n. Un dat is de lesde Satz in sien Biographie: „Es ist genug.“ – Ok disse Biographie wiest us: Dat Leven sülfst schrifft us de Geschichten, de us an‘n mehrsten packt.

Patrick Strasser & Günter Klein, Hoeness – die Biografie, riva-Verlag.

Meine Themen: Verpassen Sie keine für Sie wichtige Meldung mehr!

So erstellen Sie sich Ihre persönliche Nachrichtenseite:

  1. Registrieren Sie sich auf NWZonline bzw. melden Sie sich an, wenn Sie schon einen Zugang haben.
  2. Unter jedem Artikel finden Sie ausgewählte Themen, denen Sie folgen können.
  3. Per Klick aktivieren Sie ein Thema, die Auswahl färbt sich blau. Sie können es jederzeit auch wieder per Klick deaktivieren.
  4. Nun finden Sie auf Ihrer persönlichen Übersichtsseite alle passenden Artikel zu Ihrer Auswahl.

Ihre Meinung über 

Hinweis: Unsere Kommentarfunktion nutzt das Plug-In „DISQUS“ vom Betreiber DISQUS Inc., 717 Market St., San Francisco, CA 94103, USA, die für die Verarbeitung der Kommentare verantwortlich sind. Wir greifen nur bei Nutzerbeschwerden über Verstöße der Netiquette in den Dialog ein, können aber keine personenbezogenen Informationen des Nutzers einsehen oder verarbeiten.