Wat „Arbeit“ is, dat hett Sebastian Ibbeken al in jungen Johrn lehrt. He weer eerst foffteihn, do weer Sebastian al an’t Warkeln bi een „GaLa Betrieb“. Hier weer he an’t Plastern, un he broch männigenen Goorn up Schick, kunn he so doch sien Taschengeld so’n beten grötter maken. An disse Arbeit harr he veel Pläseer, un för em stund fast: „Landschaftsgärtner, dat is mien Ding!“ So maak he denn ok sien Schoolpraktikum bi twee verscheden Firmen, de dat mi „GaLa Bau“ to doon hefft. Een Firma weer de van Volker Kreye in Gannerseer, un hier lehr he denn ok dree Johr lang up Goorner. „Landschaftsgärtner, dat is een Beruf, wor dat jümmer een ne’e Upgaav gifft. Un hest du een Projekt klor krägen, so is dat wunnerbor, dat een Droom van enen Goorn rejell wat wurrn is. Du kannst sehn, wat du up’n Weg brocht hest“, so vertellt, bannig stolt, Sebastian Ibbeken. In sien Lehrtiet wunn he 2010 – tohoop mit’n Kollegen – den „Landesentscheid zum Landschaftsgärtner-Cup“ in Bad Essen. Bi’n „Bundesentscheid“ in Nürnberg weer bloots een Koppel ut Baden-Württemberg noch beter. Sebastian Ibbeken sien Lehrtiet gung in’n Sommer 2011 to Enn, un he broch dat hier up de Note 1,8. Al in disse Lehrtiet mell he een „Nebengewerbe“ an, denn dat he as Landschaftsgärtner besünners goot is, dat harr sik rumsnackt. Na sein Lehrtiet kunn he bi verscheden Firmen för de Praxis noch’n Barg tolehrn. För sien egen Firma weer he na’n Fieravend un an’n Weekenend aktiv. „Man dat wurd toveel Arbeit, dat kunnst du so nebenbi nich mehr vör’nanner kriegen!“, hett Sebastian na een Tiet faststellt. Siet September 2012 is sien Doon heel un deel bi sien Een-Mann-Firma. 2013/14 besoch he de Meisterschool in Rostrup, un achteran gung de Arbeit in sinen Bedrief wieter. „För de Meisterschool heff ik denn in de ‘drütte Schicht’ lehrt, un dat weer laat an’n Avend oder an’n Sonndag“. As he den Meisterbreef in sien Tasch harr, nehm he den eersten Lehrjung in sine Firma. Vandaag höört to sien „Team“ van „Ibbeken Garten und Landschaft“ söss Lüüd to, twee van disse Söss sünd Lehrjungs. Lüüd to’n Landschaftsgärtner uttobilden, dat maakt Sebastian mit veel Hart: „Us Weeswark bruukt Lüüd, de ehr Fack verstaht. Un disse köönt bloots ut us egen Rebett kamen.“ För de „Landwirtschaftskammer“ hett he ok maal de Rull as „Model“ övernahmen, wull de Kammer doch up disse Art un Wies för de „Grönen Berufe“ warven. Un dat is noch nich allns: He sitt ok noch in’n „Prüfungsausschuss“ van de Kammer. Wat beter is as „Arbeitsplatz Natur“, dat kann sik Sebastian Ibbeken ut Berne rein gor nich vörstellen; dat dat so is, dor will he ok de jungen Lüüd van övertügen.

Beten wat över Sebastian Ibbeken

Dat Öller: 28

Ik wahn in: Berne

Familjenstand: Befreet mit Mareike

Ik mag geern: Mien egen Weg gahn

Opregen do ik mi över: Lüüd, de nich belastbor sünd

An’n leevsten to äten: Fleesch

Dat kummt mi nich op’n Disch: Rosenkohl

Dar fahr ik geern mal hen: Ski föhrn in Öösterriek

Mien Hobby: Angeln

An’n leevsten mag ik höörn: De „Toten Hosen“ sünd jümmers goot

Dat Book gefallt mi besunners goot: „Der Schwarm“

Mien grötste Wunsch: Gesundheit un körperliche Fitness

Dat is mien Snack: Wer Stress hat, hat seine Arbeit nicht im Griff

Ton Verstahn:

Plattdeutsch                  Hochdeutsch

Pläseer                    Vergnügen

Droom             Traum

mellen            melden

drütte                       dritte

Söss              Sechs

Weeswark         Branche